اسلام آباد۔15اگست(اے پی پی)وفاقی وزیر موسمیاتی تبدیلی اتے ماحولیاتی ہم آہنگی ڈاکٹر مصدق ملک آکھیا جو پاکستان دے مختلف حصے ایں ویلھے تکھیاں بارشاں اتے تباہ کن سیلاب دی ولھیٹ اچ ہین، متاثرہ خانداناں نال افسوس کریندے ہیں، انہاں دا صدمہ صرف متاثرہ خانداناں تئیں محدود نئیں ٻھل پوری قوم ایں ݙکھ اچ نال اے، بے گھر تھیوݨ آلے لوکاں کوں اے یقین ݙیوینداں جو حکومتِ پاکستان ایں اوکھے ویلھے انہاں دے نال ہیں اتے ہر ممکن امداد ݙتی ویندی پئی اے۔ وزارت موسمیاتی تبدیلی اتے ماحولیاتی ہم آہنگی موجب وفاقی وزیر آکھیا جو پاکستان دے مختلف حصے ایں ویلھے تکھیاں بارشاں اتے تباہ کن سیلاب دی ولھیٹ اچ ہین، گلگت بلتستان، آزاد جموں و کشمیر، خیبر پختونخوا اتے پنجاب اچ صورتِحال ٻہوں تشویشناک اے، انہاں علاقیاں توں خوفناک مناظر ساݙے سامݨے آندے پئن۔ وزارتِ موسمیاتی تبدیلی اتے ماحولیاتی ہم آہنگی، نیشنل ڈیزاسٹر مینجمنٹ اتھارٹی اتے ٻئے اداریاں نال پوری طرح تعاون کریندی پئی اے، اتے ہر ممکن امداد اتے وسائل ݙیوݨ کیتے تیار ہیں۔ ڈاکٹر مصدق ملک آکھیا جو اے ویلھا قومی یکجہتی دا اے، حکومت اے عزم کریندی اے جو اساں اپݨیاں ساریاں توانائیاں اتے وسائل متاثرہ آبادیاں دی بحالی اتے حفاظت کیتے لیسوں اتے لوکاں دی باعزت سنٻھال تئیں اے مشن جارتی رہسی۔
