اسلام آباد۔24جون (اے پی پی) پاکستان دی حکومت افغانستان اچ ہولناک زلزلے توں متاثرہ افغان بھراواں دے ݙکھ کوں ڳھٹ کرݨ کیتے تعاون کیتے تیار اے۔ دفتر خارجہ دے ترجمان عاصم افتخار جمعے کوں پریس بریفنگ اچ آکھیاجو افغانستان دے صوبہ پکتیکار اتے اوندے نال دے علاقے اچ زلزلے اتے ملک دے مختلف صوبیاں اچ سیلاب نال تھیوݨ آلی ہلاکتاں اتے املاک دے نقصان دے بعد وزیر اعظم محمد شہباز شریف گزریل ݙینھ عبوری افغان حکومت دے قائم مقام وزیر اعظم ملا محمد حسن اخوند نال ٹیلی فون تے رابطہ کیتا اتے جاں بھق تھیوݨ آلیاں دی تعزیت اتے زخمیاں دی جلدی صحت کیتے دعا کیتی۔ انہاں آکھیا جو وزیر اعظم شہباز شریف دی ہدایت تے پاکستان افغانستان کیتے امدادی سامان بھیج ݙتے۔ پاکستان دی حکومت اتے عوام اوکھے ویلھے آپݨے افغان بھراواں دے ݙکھ کوں ڳھٹ کرݨ کیتے تعاون کرݨ تے تیار اے۔ دفتر خارجہ دے ترجمان آکھیا جو گزریل ہفتے برلن اچ فنانشل ایکشن ٹاسک فورس آپݨے اجلاس اچ پاکستان دے 2018 اتے 2021 دے ایکشن پلان کوں منیے جئیں اچ 34 آئٹمز شامل ہن۔ گرے لسٹ توں نکلݨ دے چھیکڑی قدم دے طور پاکستان دے آن سائٹ دورے دی موکل وی ݙتی اے۔
