اسلام آباد ۔ 20 دسمبر (اے پی پی) وزیرمملکت موسمیاتی تبدیلی زرتاج گل موسمیاتی تبدیلی و ماحولیاتی آلودگی تے قابو پاونڑ تے عام بندے دے معیار زندگی کوں بہتر بنڑاونڑ دے حکومتی عزم دا اعادہ کریندے ہوئیں آکھیے جو سیلابی پانڑیں دے تحفظ کیتے وزارت موسمیاتی تبدیلی ”ریچارج پاکستان” منصوبے تے کم شروع کرڈتے ، ایں منصوبے دے تحت خاص طور تے سندھ تے بلوچستان اچ موزوں جہیں تے وڈے تالاب بنڑائے ویسن جیں نال نہ صرف زیر زمین پانڑیں دی سطح اچی تھیونڑ اچ مدد ملسی بلکہ فصلاں رہاونڑ کیتے پانڑیں دستیاب ہوسی ۔ اے گال انہاں ”اے پی پی“ ہیڈ کوارٹرز دے دورے دے موقع تے پینل انٹرویو دے دوران آکھی اے ۔انہاں مزید آکھیے جو ہاﺅسنگ سوسائٹیز کوں ایں گال دا پابند کریسوں جو او پارکس کیتے مختص جاہ کوں کہیں بئے مقصد کیتے استعمال نہ کرن ، پاکستان تحریک انصاف دی حکومت برسر اقتدار آونڑ دے بعد ساریں توں ودھ توجہ بلاتفریق احتساب، ماحولیاتی آلودگی تے قابوپاونڑ تے عوام دا معیار زندگی اچا کرنڑ کیتے احساس پروگرام تے توجہ رکھی اے ، حکومت مہانگ تے قابو پاونڑ کیتے ہنگامی بنیاداں تے اقدامات کریندی پئی اے ۔زرتاج گل آکھیے جو ملک اچ سیلابی پانڑیں کوں محفوظ بنڑاونڑ کیتے وفاقی تے صوبائی حکومتاں کوں وڈے منصوبیں تے کم کرنڑ دی ضرورت اے ایں مقصد کیتے وزارت موسمیاتی تبدیلی ” ریچارج پاکستان” منصوبہ شروع کرنڑ ویندی پئی اے تے وزیر اعظم عمران خان ایں منصوبے دی سمری منظور کر گھدی اے ۔
