اسلام آباد۔8اکتوبر (اے پی پی)وزیراعظم عمران خان آکھیے جو پی ٹی آئی حکومت دا منشور عوام دی عملی خدمت کرنڑ اے ، سرکاری اداریں کوں ہر صورت عوام دی خدمت دا پابند بنڑایا ونجے ، گورننس سسٹم دی بہتری عوام اتے سرکاری اداریں وچال چنگے رابطے نال مشروط اے ۔ وزیراعظم آفس توں جاری بیان موجب سرکاری اداریں ، محکمیں تئیں تلویں طبقے دی رسائی کوں مزید سوکھا بنڑاونڑ دا حکم ڈتا گئے ۔ پاکستان سٹیزن پورٹل شہریاں دی شراکتی گورننس دے ودھارے کیتے قائم کیتا گئے تاں جو لوکاں دے مسئلے حل کرنڑ کیتے سرکاری ادارے موثر خدمات ڈے سگن ۔ وزیراعظم دی ہدایت تے ملک دا ساریں توں وڈا شکایات دا نظام پورا فعال تھی گئے ، سبھے صوبیں اچ سٹیزن پورٹل تے افسران دے 8864 ڈیش بورڈز کوں ذمے واری ڈے ڈتی گئی اے جیرھا جو وزیراعظم عمران خان دا تلویں اتے بے سہارا لوکاں کیتے ہک بہوں وڈا اقدام اے ،ایں سلسلے اچ وزیراعظم آفس پورے ملک دے 8864 توں ودھ سرکاری دفتراں، سارے وفاقی سیکرٹریز،چیف سیکرٹریز اتے آئی جیز کوں مراسلہ جاری کیتے جیں دے تحت سرکاری افسراں کوں آپنڑے ڈیش بورڈز نالکمزور طبقے دیاں شکایتاں درج کرنڑ دا حکم ڈتا گئے تے خاص طور تے بزرگ شہریاں، بیوہ تریمتاں، معذور لوکاں دی سہولت کیتے خصوصی ہدایات جاری کیتیاں گئن ۔ پی ایم ڈلیوری یونٹ سرکاری اداریں کیتے ضابطہ اخلاق وی جاری کیتے تے ہنڑ ضرورت مند شہریاں کوں آپ دیاں شکایتاں کیتے متعلقہ ادارے ونجنڑ دی لوڑھ کائنی ، کہیں وی نیڑے سرکاری دفتر اچ عملہ شہری دی شکایات درج کرنڑ دا پابند ہوسی ، سرکاری ادارے شہری دی شکایت وختی متعلقہ محکمے کوں بھیجنڑ دے وی پابند ہوسن ۔شہریاں کوں سہولت بارے ڈساونڑ کیتے آگاہی مہم وی شروع کیتی ویسی ۔
