اسلام آباد18فروری(اے پی پی)الیکشن کمیشن انکوائری کمیٹی راولپنڈی ڈویژن دے ڈسٹرکٹ ریٹرننگ افسران کوں سݙ ڳھدے۔ سابق کمشنر راولپنڈی لیاقت علی چٹھہ دے الزامات دی تحقیقات کیتے الیکشن کمیشن دی انکوائری کمیٹی دا پہلا اجلاس سینئر ممبر نثار درانی دی اڳواݨی اچ تھئے۔ کمیٹی معاملے تے راولپنڈی ڈویژن دے سارے ڈی آر اوز اتے ریٹرننگ افسران کوں نوٹس جاری کرݨ دا فیصلہ کیتے۔ ڈی آر اوز اتے ریٹرننگ افسران سنوار توں انکوائری کمیٹی اچ بیان ریکارڈ کرویسن اتے کمیٹی 3 ݙینھ اچ بیان ریکارڈ کریسی اتے اپݨی رپورٹ الیکشن کمیشن کوں پیش کریسی۔ کمیٹی دی رپورٹ تے کمشنر راولپنڈی دے خلاف توہین الیکشن کمیشن دی کارروائی اتے قانونی چارہ جوئی دا فیصلہ کیتا ویسی۔
