تھرپارکر۔22مارچ (اے پی پی) وزیراعظم محمد شہباز شریف آکھیا جو تھر دا صحرا اڄ پورے پاکستان کیتے روشنی کھݙیندا پے اتے پاکستان دی ترقی اتے خوشحالی دا مرکز ٻݨدا پے۔ زراعت ، ٹیکنالوجی،تجارت، سرمایہ کاری اتے اکنامک زونز ٻݨاوݨ سی پیک دا اگلہ مرحلہ اے جئیں کوں ہݨ اڳوں ودھاوݨ دا ویلھا آڳے۔ اتحادی حکومت رَل تے پاکستان کوں اوکھ توں کݙھیسی۔ پاکستان دی ترقی دے دشمن اتے بدخواہاں کوں منہ دی کھاوݨی پوسی۔ آئین پاکستان اساں ساریاں کیتے مقدم اے۔ پاکستان دے وسیع تر فائدے کیتے اساں اپݨی ذات کوں قربان کرݨا پووے تاں اے کوئی وݙی قربانی کائنی۔ کوئی قانون اتے آئین توں اُتے کائنی۔ کوئی ایں ملک اندر دہشت گرداں کوں پناہ نی ݙے سڳدا۔ دہشت گرداں کوں ڈھال ٻݨاوݨ ناقابل برداشت اے اتے ایندی موکل کائنا ݙتی ویسی۔ او بدھ کوں تھر اچ مقامی کوئلے توں چلݨ آلے توانائی دے ݙو منصوبیاں دی افتتاحی تقریب توں خطاب کریندے پے ہن۔ ایں موقع تے وزیراعلیٰ سندھ سید مراد علی شاہ،وزیر خارجہ بلاول بھٹو زرداری،وفاقی وزرا احسن اقبال، چوہدری سالک حسین، انجینئر خرم دستگیر، مریم اورنگزیب ، چینی نائب ناظم الامور پانگ چن شوئی ، سندھ دے وزیر توانائی امتیاز شیخ اتے پاکستانی اتےچینی کمپنیاں دے حکام وی موجود ہن۔ وزیراعظم آکھیا جو اڄ پورے پاکستان کیتے اے خوشی دا ݙینھ اے جو اڄ تھر دے صحرا اچ ٻی محنت اتے کوششاں نال 330 میگاواٹ دا ہک منصوبہ تھل نوووا تھر اتے 1320میگاواٹ دا ہک ٻیا منصوبہ شنگھائی الیکٹرک جو تھرکول بلاک نال منسوب اے دا افتتاح تھیے۔ ایں دے علاوہ کوئلے کݙھݨ کیتے ہک ٻیا منصوبے دا افتتاح وی کیتے۔ وزیراعظم آکھیا جو تھر ہک صحرا ہئی اتے صحرا نوردی دے علاوہ اتھ ریت دے ٹیلے ہن ایں سوا کجھ نا ہئی۔ ݙھاکیاں دی منصوبہ بندی اتے حکومت عملی پاروں اے صحرا صنعت اتے حرفت اچ بدل ڳے۔ تھر کوئلے دے ذخائراللہ تعالیٰ اساکوں تحفے اچ ݙتن اتے سو سال تئیں درکار ذخیرہ اتھاں موجود اے جیڑھا ہزاراں میگاواٹ بجلی ٻݨا سڳدے۔ تھراچ ترقی اتے خوشحالی دے جیڑھے عظیم منصوبے شروع تھیے اے پاکستان دی ترقی، معیشت اتے خوشحالی اچ آندی نسلاں اچ ٻہوں تقویت ݙیسی۔ انہاں آکھیا جو ٹرانسمیشن لائنز تے تکھے کم تھیندا پے۔ 30اپریل تئیں ٹرانسمیشن لائنز دا کم کر ڳھدا ویسی۔ وزیراعظم بلاول بھٹو زرداری، وزیراعلیٰ سندھ مراد علی شاہ، وزیر توانائی اتے متعلقہ وزارتاں اتےحکام کوں ایں منصوبے تے شاباش ݙیندیں ہوئیں آکھیا جو تھر دی ترقی پاکستان دی ترقی اے۔ وزیراعظم چینی صدر اتے چین دی حکومت اتے متعلقہ حکام دا وی شکریہ ادا کیتا۔ ایں موقع تے انہاں پلانٹ دے مختلف حصیاں دا معائنہ وی کیتا۔ وزیراعظم کوں تھر بلاک ون مائن توں کوئلے دی فراہمی، بوائلرز ، کولنگ ٹاورز بارے بریفنگ ݙتی ڳی۔
.jpg)
.jpg)