کراچی۔9اگست(اے پی پی)وزیراعظم محمد شہباز شریف آکھیے جو پاکستان اتے چین دی سنڳت بے مثال اے ڄیکوں ہݨ اساں سرمایہ کاری، معاشی و تجارتی تعلقات دے وݙے ڳانݙھے اچ ڳنݙھیندے پئے ہیں، چین پاکستان اقتصادی راہداری دا اگلا مرحلہ خاص کر صنعتی شعبہ اچ بزنس ٹو بزنس انتظامات تے مشتمل ہوسی۔ اے ڳالھ انہاں کراچی اچ چین سودھا پاکستان اچ کاروبار کرݨ آلیاں بین الاقوامی کمپنیاں دے نمائنداں نال خطاب اچ آکھی۔
وزیراعظم آکھیا جو نمائش اچ 150 کاروباری شخصیات دے چینی وفد دی شرکت تے ٻہوں خوشی اے، پاکستان اتے چین ” آئرن برادرز ” ہین، ایں سنڳت کوں اساں ٻیا تکڑا کرݨ کیتے سرمایہ کاری، معاشی و تجارتی تعلقات ساڄھے داری خاص کر زراعت، انفارمیشن ٹیکنالوجی، معدنیات وکان کنی اتے بنیادی ڈھانچہ دے شعبیان اچ ڳانݙھے نال ڳنݙھیسوں، دورہ چین اچ شانکسی صوبہ دی اہم زرعی یونیورسٹی اتے تحقیقی مرکز دا دورہ کیتے جیندے بعد اساں ہک ہزار زرعی گریجویٹ طلبا وطالبات کوں اعلیٰ تربیت کیتے چین ٻھیڄݨ دا فیصلہ کیتے، چینی ہم منصباں نال صلاح توں بعد اے طلبہ چینی یونیورسٹیاں اچ ریفریشر کورسز کریسن۔ انہاں آکھیا جو پاکستان ہک زرعی معیشت آلا ملک اے جیندی 60 فیصدآبادی دیہی علاقیاں اچ وسدی اے، ایں سانڳے پاکستان کوں زرعی پیداوار ودھاوݨ دی لوڑھ اے، کوشش اے جو ایں ویلھے دیاں زرعی برآمدات کوں 7 ارب ڈالر تئیں ودھایا ونڄے جیندے کیتے ودھ پورھیے دی لوڑھ اے، زرعی پیداوار دے ودھارے کیتے پاکستان کوں جدید ٹیکنالوجی اتے اڄوکے طریقے اپناوݨے ہوسن، برآمدات کیتے ویلیوایڈڈ مصنوعات دی شعبہ اچ اہداف سانڳے چین پاکستان دا اہم شراکت دار ملک ٻݨ سڳدے۔
انہاں چینی تاجراں کوں پاکستانی تاجراں نال بزنس ٹوبزنس معاہدے کرݨ تے زور ݙتے جو سی پیک دا آندا مرحلہ بطور خاص صنعتی شعبہ اچ بزنس ٹوبزنس انتظامات آلا ہوسی، جتھاں ٹیکسٹائل انڈسٹری اتے زرعی پیداوار دے شعبیاں اچ مشترکہ منصوبے شروع کیتے ویسن اتےو دھ زرمبادلہ کامیا ویسی، پاکستان اتے چین اپݨیاں مصنوعات دی برآمد کیتے مشترکہ طریقہ اپنیسن جیندے نال ݙوہیں ملکاں دا فیدہ تھیسی۔ وزیر اعظم آکھیے جو پاک چین دوستی ٻہوں ڳاھتی اے جیندے تحت اساں اپݨا سیارہ وی خلا اچ ٻھڄیے، ہݨ ݙوہاں ملکاں وچال تعلقات کوں سی پیک دے فیزٹو اچ ٻئے تجارتی و معاشی تعلقات اچ وٹایا ویسی۔
.jpg)
.jpg)
.jpg)